|
POLOA’IGA FA’ALAUA’ITELE
FA’ATULAGAINA O LE ASO 6 FEPUARI 2008 E FAI MA
ASO O LE FONO TATALO I AMERIKA SAMOA
TALUAI, o le Teritori o Amerika Samoa, talu mai ona fa’a-Kerisianoina o tatou motu, ua matua talia ma opogi i le loto ma le agaga o talitonuga ma fa’avae fa’a-Kerisiano ua fausia ai le soifua fa’aleagaga ma autu o le fa’avae fa’atemokarasi o le Unaite Setete o Amerika, a e fa’apea ai fo’i le fa’avae mautu o lo tatou lava malo fa’a-Teritori; ma
TALUAI, o nei uma talitonuga ma fa’avae ua avea ma mea e aofaga i ai o tatou tagata ma aganu’u, fa’apea fo’i ma le soifua o i latou uma o lo’o ta’ita’iina aiga, nu’u, ekalesia ma le tatou faigamalo mai le selau ma le valu tausaga ua mavae; ma
TALUAI, o le ola fa’aleagaga i lo tatou atunu’u o lo’o tatou faia pea ma fa’amanatu i lo tatou soifua i aso uma i Amerika Samoa nei; ma
TALUAI, e matua onomea ma tatau ai ona tatou ave ma tu’uina atu le fa’afetai ma le vi’iga ona o fa’amanuiaga e tele ua foa’iina mai e le Atua ia Amerika Samoa, fa’atasi ai ma la tatou tatalo ina ia fa’auauina e le Atua ana fa’amanuiaga ia Amerika Samoa ma faigamalo uma o le lalolagi ma o latou ta’ita’i, e aunoa ma le fa’ailoga lanu, gagane, ituaiga, ma talitonuga fa’atapua’iga i so’o se itu o le kelope o lo’o a’afia i nei fa’afitauli o le lalolagi; ma
TALUAI, ona o le muagagana fa’avae ma le autu tauave o le Teritori o Amerika Samoa ua fa’atulagaina “SAMOA MUAMUA LE ATUA”; ma
O LENEI, O A’U, AITOFELE T.F. SUNIA, Kovana Lutena o Amerika Samoa, e tusa ai ma le malosi fa’atulafono ua tu’uina ia te a’u i le Vaega IV o le Fa’avae Teuteu o Amerika Samoa, o le mea lea ua ou tu’u aloa’ia ai se fa’atonuga ia fa’atulagaina le Aso Lulu muamua, Fepuari 6, 2008, pe a mavae le aso muamua o le Masina o Fepuari i tausaga ta’itasi e fa’amanatuina o le Aso Tatalo mo le Malo o Amerika Samoa. Ua talosagaina tagatanu’u uma o Amerika Samoa ia tatalo ma manatua o tatou lava ta’ita’i ma ta’ita’i o le lalolagi ia tatou tatalo i lea lava aso fa’apitoa ua fa’atulagaina.
Ua ou fa’amaonia ma sainia ai lenei Poloa’iga Fa’alaua’itele i le Aso lua sefulu fa lenei o Ianuari, lua afe ma le fitu.
AITOFELE T. F. SUNIA
---americansamoa.gov---
|
