Governors Address 1/3/21 | AMERICAN SAMOA

Saunoaga

Afioga Lemanu Peleti Palepoi Sialega Mauga

Fa’au’uga: Kovana ma le Kovana Lutena

Malaeoletalu, Fagatogo

3 Ianuari 2021

E tu manu ae lili’a, auā ua pa’iao le faleselau. E le tioa fo’i a se’e lili’a le ali’i o Pulotu, auā e mapu’e galu, mapu’e le lagi, mapu’e le tiasā; ae popo’e le gogo e faigata le ta’otoga o i’asa.

Ta’oto ia pa’ia na fa’ausu, auā le afifio o le atunu’u sa, aemaise le Malo o Amerika Samoa.

Tulouna ia le afio o le La’au-na-Amotasi. O pa’ia lava ia o le Motu Sa auā le afifio o Ali’i Fa’atui, ma le Fetalaiga i To’oto’o o le Manu’atele.

Tulouna le Mamalu o le Faleagafulu i le afifio o Fa’asuaga, Tama Matua ma Faleupolu o tofiga auā e’e ma faigā o Sua ma le Vaifanua, Fofō ma Aitulaga, Sa’ole ma le Launiusaelua, Itu’au ma Alataua, ae maise le Afifio o Ma’opu.

Ae le vaea ai le fala‘o’oto i le tapua’iga mamalu a le aiga Sa Levi i Ekalesia ma fata faitaulaga e fia o le atunu’u, o lo’o nōnō manū auā Amerika Samoa ma ona tagata. Malo fa’afetai le osi-taulaga i lau Susuga le Fa’afeagaiga, a o le Sui Ta’ita’i Fono a le Ekalesia Aoao a le EFKAS. Ia saga utu pūpūina fulu o le sega’ula, mau pea lau lauga ma ia maua ni agaga se tele auā le Atua ma lona finagalo.

Tulouna fo’i fa’auluuluga ma ta’ita’i o pisinisi i totonu o le atunu’u; Tamā ma Tinā matutua; tainane le lalovaoa o le atunu’u i tama ma teine. Tulou, tulou lava.

Oute fa’atulou atu i lau Afioga i le Kovana o le Malo o Amerika Samoa ua fou malolo, lau Tofa i le To’oto’o, Lolo Matalasi Moliga ma le Faletua, aemaise le Kapeneta.

Tulouna lau afioga a le Fa’amasino Sili, ma le vaega tuma’oti o Fa’amasinoga.

Oute fa’atulou atu fo’i i le mamalu o le Fono Faitulafono; Lau afioga le Peresetene ma le Senate; fa’apea lau Afioga le Fofoga Fetalai ma le mamalu o le Maota o Sui.

Oute fa’atulou atu fo’i i pa’ia ma mamalu tau e’e o le Malo Tuto’atasi o Samoa i le afio o lau Afioga le Tama Aiga, le Ao Mamalu o le Malo ma lau Masiofo; Tulouna lau Afioga i le Palemia ma le Faletua, aemaise le mamalu o le Kapeneta; e’eta’i fo’i lau Afioga le Fofoga Fetalai ma le mamalu o le Palemene o Samoa; O mamalu lava ia o Pule ma Tumua, i Aiga ma Tama, Tama fo’i ma Aiga. O pa’ia na o Itu’au ma Alataua, Aiga i le Tai, ma le va’a o Fonoti. Tulou, Tulouna lava.

E e’e le tula’i, ae fa’agae’etia le lagona, ona o le maualuga o lau fa’aaloalo Amerika Samoa, ua e tofia ai ma’ua ma le Tofa a Talauega Va’alele Ale ma te ta’ita’i la tatou faigamalo mo lenei fa tausaga ua savalia nei. Ma te fa’afetai tele atu i lo outou FA’ATUATUAINA O I MA’UA; O MA’UA LAVA ONI AUAUNA FA’ATAUVA’A. Fa’afetai, fa’afetai tele lava.

O la ma’ua ta’utinoga i le atunu’u… ma te fa’atāuaina tagata uma o le atunu’u ma le Malo. E le fa’apito manū ia Tasi, ae o la ma va’ai ma le ta’ita’iga, e fa’asalafa i tagata uma i ala tutusa ma le le fa’ailoga tagata. O le ta’utinoga lea na ma’ua faia a o tāpā lau tōfā fa’atupu. O lena lava le fa’amoemoe o le faigamalo o le a tatou alo atu iai i lenei fa tausaga.

E avatu la ma’ua fa’afetai ma le Tofa Talauega i lau Afioga Lolo ma le taupulega, aemaise ai fo’i a oulua Afioga – le Peresetene Gaoteote, ma le Fofoga Fetalai Savali ma maota e lua i avanoa lelei sa tatou galulue so’oso’o tau’au ai i le fa’afoeina ma le ta’ita’iga o le tatou Malo i nofoa’iga ua mavae atu nei. Fa’amalo fai o le faiva. Fa’afetai galulue punoua’i mo le manuia ma le saogalemu o Amerika Samoa ma ona tagata. Fa’amanuia tele le Atua a o alo atu i malologa mai le mamafa tū o le galuega. Lagi e mama, ma le soifua manuia, ma ia fa’atumauina le alofa o le Atua.

Le mamalu o le Aofia, mālō, fa’afetai tali vala’aulia i le fa’atala’u’ula atu a le Afioga i le Kovana Lutena ia Talauega ma le Faletua ia Marian Ale, ma i ma’ua ma le Tinā ia Ella. Ua maualuga lenei aso i lo outou afifio mai. Ae o le avanoa lelei fo’i e fa’afeiloa’i atu ai i si o’u to’alua ia Ella ma ni isi ole fanau, o lo’o maimoa mai i luga o upega tafa’ilagi.

O le aso Sa Fa’amanatuga, ae o le aso Sa muamua fo’i o le Tausaga Fou. O se faigamalo fou, ae ose Amerika Samoa e sa’ili manuia i lona aga’i i luma auā upu fai o Malo. Ua fai mai - o Samoa o se atunu’u tofi, ae o le atunu’u fo’i e fa’amuamua le Atua. A tatou tausi ma tausisi i tofiga e pei ona tatou talitonuina, e tatau fo’i la ona tatou malamalama uma i galuega o lea tulaga, ma lea tulaga, ae fa’apena fo’i i lea tagata tautua, ma lea tagata tautua.

Ma te talitonu o se galuega tāua o lenei nofoa’iga, o le toe u’una’ina lea o tagatanu’u o le atunu’u, ae maise fanau… e toe totō i o latou loto, agaga, ma o latou fatu, lo latou tāua i lenei faigamalo ma le atunu’u. E totō i o outou loto, agaga, ma fatu, o outou o le OLA o le atunu’u. O outou o le FA’AMOEMOEGA o le atunu’u. O outou fo’i o le LUMANA’I MANUIA o le atunu’u.

Faith and Trust, has to be restored, because that is LIFE, HOPE, and HAPPINESS, mo Amerika Samoa.

O le toe fa’amausaliina o lou talitonuga ia te oe lava ia, e le mafai e ma’ua, ma le faigamalo ona avatu ia te outou le atunu’u ia tulaga. Ae mafai e lau faigamalo ona fa’afaigofie fuafuaga fai i le soifuaga e mausali ai o outou finagalo ma outou loto e talitonuina ai le lelei, le sa’o, ae o se lumana’i mautu e tatou te ‘au’auna fa’atasi ai.

Ua ma iloa ua outou momo’o mo se faigamalo e fa’atuatuaina i le fa’amaoni, ma le alofa i tagata nu’u uma. O lea fo’i ua ma iloa e tatau ona toe ma va’ava’ai lelei i le fa’atulaga’ina o le Malo, aemaise o le toe fa’amanatu i le Malo, o le Malo mo tagata, ae le o tagata mo le Malo. O le Malo e tautua, ae le tautuaina. Pe tatou te matitiva, pe tatou te felanulanua’i, pe ua fa’agaloina fo’i tatou e le lalolagi, e ma te manatua pea, o tagatanu’u uma o Amerika Samoa, e iai o outou aiā e tatou te talitonu ai, o le faigamalo, o lau fo’i lea. E tatou te gagana ‘ese’ese, aganu’u ‘ese’ese, fai tapua’iga ‘ese’ese, ae tatou te pi’i ama fa’atasi i le talitonuga e iai a tatou galuega e fafau fa’atasi, ona galue’ina fa’atasi ai lea, ma tatou selesele ai lea o fua o talitonuga mo se faigamalo e lumana’i manuia ai ona tagatanu’u.

O le fesili, o ta’amilo ea Amerika Samoa i le ta’amiloga ma suiga o le lalolagi? O le tali IOE. Fesili, o nei ta’amiloga, ma nei suiga o le lalolagi ma Amerika Samoa, o atoa ai ea le atunu’u i ona fa’amanuiaga ma lona saogalemu? Tali, E LEAI.

Ina ua ma savalia afio’aga ‘ese’ese ma le Kovana Lutena ia Talauega, sa asia ai le tele o aiga o Amerika Samoa. E maoa’e fo’i le va’ai, ma le loto fa’aga’e’etia. Manaia tulaga o alatele, maota ma laoa o lo’o tu-lata i autafa o alatele, vaganā ai nai nu’u i tua ma nu’u tu pito. Mananaia tulaga o fale o le Malo. Ae fai lava si maofa o le loto i le tele o aiga ua matua fa’aletonu tulaga o nofoaga.

I afio’aga uma o Amerika Samoa ua tele maota ma laoa ua le nofoia. Ua tele le mamalu o le atunu’u ua gasolo atu i fafo, ma nonofo ai. O le fesili, pe ai sea? O le upu moni, ua fesiligia le lumana’i o fanau, ma ua le talitonuina e matua se soifua manuia o nai o latou alo i le tatou atunu’u.

O se lu’itau e le na’o ma’ua ma le faigamalo, ae o tatou uma. Toe totō le ‘ele’ele, ma fa’asūsū, ia olaola manuia le atunu’u, aemaise le lumana’i o fanau.

Feiloa’i ma nai aiga i Fagamalo ma Malota, a tetele timuga ua le mafai ona saofia ta’avale i tafega o le ala tele. Le afio’aga i Leone, e va-iti auala laupapa toetoe a le sao ai ta’avale a le falema’i i si aiga, ae alu si Tinā i le nofoa fa’ata’avalevale. Malaeimi, Kokoland, Faga’ima, ma Tafuna e lolo vaia pe a tetele timuga. A’o le tafega fo’i i luga lava o le ‘auala i totonu o Faga’ima ma Kokoland, ua fai ai fa’ase’ega e pei o galu fati i tuā’au. Ua le sao ta’avale, fa’aleagaina ‘auala, aemaise maota ma laoa o aiga.

I le ma savaliga, se tasi Tina na maligi loimata ma fai mai, “ua atoa le tausaga o fa’atali se avanoa faigaluega a si a’u tama, leai lava se tali a le Malo.”

Ae fa’apefea ea si o tatou motu o Manu’a, ma Olohenga?

E lelei, ma tatau suiga i le ta’amiloga o le lalolagi. E taua tele ona fai suiga mo Amerika Samoa, ina ia o tutusa ai ma Amerika aemaise le lalolagi. Ae tatau fo’i ma tāua ona o gatasi suiga o le atunu’u, ma tagatanu’u uma o le atunu’u. O le a ea le uiga o ia molimau?

E iai le manatu e mafai ona tatou faia suiga ia, pe a toe tatou tepa tasi lava i le fa’avae. Tatou toe silasila i le tatou fa’asinomaga. O ai a’u, a o ai oe? Se’i tulou. Ua totofi le lalolagi, o tagata a le Atua. A’o tatou, o Samoa lava i tatou. Ua mana’omia ona tapena mautū le lotoifale o le Samoa, i ana tu ma agaifanua, aemaise lona soifua fa’akerisiano, e fa’avae i le alofa.

Afai ua leai se fa’amoemoega o le to’atele i se lumana’i manuia o Amerika Samoa, lea ua gasolosolo ai i fafo ma nonofo ai, ona popo’e lea o le agaga. O le fesili. Po’o le aganu’u ea – o le isi lea faigata o le tatou soifuaga? O le upu moni, ua taugatā le aganu’u. Ua taugatā ai le soifuaga. Ua tau le gafatia ma le tago lima tagata nu’u i tulaga o le aganu’u. A leai se fanau lumana’i, ua leai fo’i se aganu’u, leai fo’i se Samoa. Le atunu’u e, i ona tupu ma ona e’e, ma faleupolu o tofiga, le tatou aganu’u i mou atu. Taofiofi le aganu’u, auā o le tatou fa’asinomaga lena na totofi mai ai tatou e le Atua.

Sa ou lotu i le toe sauiniga o se Faletua o le Fa’afeagaiga Taulagi a se tasi o Afio’aga. O se sauniga mautu ma lelei, ma lava tapena. Ina ua fai molimau a le fanau, na o’otia le loto, le agaga, ma le tino, i le alofa. Le alofa e le tautalagia; le alofa e le tau fa’amalamalama’ina; le alofa e tutui ai le fatu, ma tau le ulufia ai le ea i le mama. O le tulaga maoa’e, e le’i maligi loimata o le fanau i le taimi o latou molimau, ae sa tagi masūsū si o latou Tama, le Susuga i le Fa’afeagaiga. Ae ou te iloa, i tua atu o molimau, o lo’o tafe fa’avaitafe le to’ulu o loimata o le fanau, e pei lava o si o latou Tamā. Se tulaga a faigata. O le lē fa’atasi ma matua i o latou toe taimi. O molimau a le fanau e pei ona fa’amatala atu, sa pu’e mai i le video, fa’aali i le TV i totonu o le Malumalu. O le fanau o lo’o tagi mai ala.

Sa maligi loimata, o loimata o le alofa, auā a na tupu fo’i i so’o se isi o tatou, o se tasi lea o avega mamafa i lenei soifuaga, ma fesiligia ai le fa’atuatua ma le mafutaga ma le Atua. Talofa i le atunu’u o lo’o tagi mai ala.

Le atunu’u e, e le o ni fa’asalaga e aumai e le Atua, i le lē fa’atasitasi o aiga. A o isi ia o lu’itau o le soifuaga, ua iai tali ma olo e puipui ai. A o tatou fo’i ta’ita’i ma le malo tautua, ua tu’uina mai e le Atua le poto ma le tomai su’esu’e, e tapena ai ma fai ai fa’ai’uga, e mafuta lelei ai aiga. O fea ea le nofo lelei ma le fiafia pe a le fa’atasi ma fanau, matua, ma aiga? A o ai ea se Samoa e fia soifua na o ia i nu’u ese i lenei olaga? Amerika Samoa, o le agaga, loto, ma le fatu – o le aiga.

Ua pupula o ma’ua mata, ua ma lagona mafatiaga. E momoli atu ai alofa’aga i le mamalu o le atunu’u o lo’o tagi mai ala, ona o le tapunia o ala feso’ota’i ma si o tatou atunu’u. Malo le onosa’i, malo fo’i le fa’apalepale. Ona ou manatua ai lea o le upu a le Tusi, i le tusi a Esoto, fai mai, “… ona fetalai mai lea o le Ali’i le Atua o Isaraelu, Ia e tu’uina mai lo’u nu’u, ia latou fai se tausamiga ia te a’u i le vao.” “Let my people go, that they may hold a feast unto me in the wilderness.”

E ui lava o lo’o fa’amalumalu mai pea le fa’ama’i o le KOVITI 19, o lea lava o lo’o malu puipuia i tatou uma i fuafuaga a le Atua ma le faigamalo. O lenei la aso, oute fa’alauiloa atu ai i luma o le atunu’u, o lea ua iai le ma agaga ma le Afioga i le Kovana Lutena o le a amata taeao ona fa’amautu feso’ota’iga, auā le toe fo’i mai o Tagatanu’u o Amerika Samoa, i o latou fanua ma o latou lau’ele’ele. I lo latou fa’asinomaga e pei ona totofi ai tatou e le Atua, aemaise lava i o latou aiga. O iina tonu o lo’o ta’oto ai fuafuaga a le Atua mo tatou uma, i le OLA, SA’OLOTO, ma le FIAFIA.

Alofa’aga fo’i ma fa’amanuiaga i le mamalu o le atunu’u o lo’o nonofo mau i fafo. I tama fanau ma o outou aiga o lo’o tautua i vaega’au ‘ese’ese o le Malo Tele, e le lava a matou upu e momoli atu ai le agaga o le fa’afetai, auā a na leai oe, e leai fo’i a’u. Ua e mafatia i manu’aga o le mafaufau ma le tino, ona o lau galuega o le oti ma le ola, lea ua matou momoe ai i le filemu. Ua motusia a outou mafutaga ma o outou aiga, ina ia nonofo puipuia ai o matou aiga. Ua ofo atu lou ola i lou malo… ina ia maua ai e matou le sa’olotoga. Malo, fa’afetai tautua. Malo, fa’afetai alofa. Malo, fa’afetai lotonu’u.

Fanau a’oga a le atunu’u, ia outou sulu ma le ulu, ‘aua le fa’avaivai, ‘aua fo’i le mulimuli i ta’iga. Leai se mea lelei e mauagofie. Fa’amalolosi, ma toe fo’i mai ma se ‘ai.

O tala o le faigamalo a Tutuila, Manu’a, ma Olohenga, e leai se faigamalo e fa’aauau ae leai se tupe e fa’aauau ai. I le ma talitonuga ma le Afioga le Kovana Lutena ia Talauega, o le Malo sa tatau ona tapunia, auā ua uma le taimi fa’atulagaina e le i’ugafono na pasia e le Fono Faitulafono, i le tala o tupe fa’aauau mo le nei tausaga fa’aletupe.

E ma te talosaga atu i le mamalu o le Fono Faitulafono, ua fa’ao’o atu tusitusiga e tauaofia ai le tatou Fono Fa’apitoa, i lenei aso pe a uma taualumaga o le nofoa’iga fou o le Maota Fono, auā se tulafono pasia, i se maliliega tu’ufa’atasi e fa’aauau ai le Faigamalo, a o talitali le tupe fa’asoasoa o le 2021. Talosaga’ina fo’i le mamalu o le Fono Faitulafono, i le toe fa’aulu’ina ma toe ilo’ilo’ina, o le pili tupe fa’asoasoa a le Malo, mo le tausaga fa’aletupe – 2021.

E ma te iloa ma le Afioga i le Kovana Lutena ia Talauega Ale, o lo’o tele ma fesiligia e le mamalu o le atunu’u, po’o ai ua tofia i le Kapeneta a le tatou faigamalo. Ua ia ma’ua le ava ma le fa’aaloalo e fa’ailoa atu ai le Failautusi o Mata’upu Tau Samoa, o le Afioga i le Ma’oputasi, Mauga Tasi Asuega, lea ua ma talosagaina e fa’aauau i le tatou nofoa’iga fou.

Ia fa’amanuia le Atua i le nofoa’iga, i lau Afioga le Ma’oputasi.

Ae ou te le’i nofo i lalo, ou te fia pa’i mālūl atu i le pa’ia o le atunu’u, i ona tupu ma ona e’e. I le afio mai o lau Afioga i le Ma’oputasi, Afiofio Kovana o Falelima. E le māmā ia i ma’ua ma le Afioga i le Kovana Lutena lo tatou fa’amoemoe i le fa’apa’iaga fa’aleatunu’u. O outou Afioga i le au fuesina ma le au fueloloa ma to’oto’o uli o le atunu’u, o le agaga, tatou ‘ava tasi ia i lo tatou Ali’i, lo tatou Fa’aola. O le tatou taulaga si’i fa’atasi, ae le na o ma’ua. Tala mai ia sega ia, sou finagalo fa’atupu, auā e matua atu iinā ni o ma sese, ma ni o ma fa’aletonu. Ma te manatu ona o le aso Sapati, o lea ua fa’a le Atua ai lo tatou fa’amoemoe i lenei aso.

O le ma tatalo i le Atua i le nei nofoa’iga, ia tau ia o se fatu e pa’ū i se ‘ele’ele lelei, ia tupu ma ola, auā le atunu’u, ma ana tupulaga lalovaoa. Manuteleina lenei Aofia, le Atunu’u silasila fa’afofoga. Fa’afetai, Soifua.